Tum aisi kyun ho maa
Tum aisi kyun ho?
Apni jaan ko jokhim main daal ke
Humko duniya main laati ho.
Raat bhar bina soye
Humko mithi lori gaake sulati ho.
Bhookh lagne se pehle hi
Khana khila deti hai maa,
Rone se pehle hi
Samjha deti hai maa.
Pyaar se sir pe haath pher de to
Dard mit jate hain,
Sine se gale lagati hai toh
Jannatein mil jaati hain.
Yeh jo do akshar aaj sikh payi hu
Yeh maa ne hi sikhaya hai,
Padh likh kar aaj jo kuch bhi ban payi hu
Sab maa ka hi ashirvad hai.
Aaj badi ho gayi hu
Apne pairon par khadi hu
Laga jaise saara aasmaan cheen liya hai maine
To bhool gayi main maa ko.
Par ek din aisa aaya
Jab pankh kate mere
Zameen pe aake dham se giri main
Tab maa ne hi aake sambhala
Na jaane kya jaadu hain uske haathon main
Uska hai yeh andaaz nirala!
Zuban se kuch keh sakti, uske pehle hi
Aankhon ki nami ko padh gayi woh
Aansu tapakne se pehle hi
Gale laga li woh!
Kya bolu maa, aaj phir se
Ek nanhi si jaan ban jaane ka man karta hai
Tumhari aanchal main muh chupane ko jee chahta hai……
Duniya se bahut ladh lia hai maa,
Ab mujhe wapas ghar bula lo
Bachpan ki tarah lori gaake
Phir se mujhe sula do.
Beautiful poem of a beautiful daughter.. simply love it ..god bless you and grow in all spheres of life ahead
Thank you, mainkili